وزیراعلیٰ پنجاب سردار عثمان بزدار کے معاون خصوصی حسان خاور نے کہا ہے کہ موجودہ اپوزیشن تاریخ کی نااہل اپوزیشن رہی ہے، ہمارے اتحادی ہمارے ساتھ کھڑے ہیں۔

 حسان خاور نے شہباز شریف کی چوہدری برادران سے ملاقات پر تبصرہ  کرتے ہوئے کہا کہ موجودہ اپوزیشن تاریخ کی نااہل اپوزیشن رہی ہے، چوہدری شجاعت اپنی کتاب میں شریف برادران کی منافقت کا تذکرہ کرچکے ہیں۔حسان خاور نے کہا کہ پیپلز پارٹی نے ساڑھے 3 سالوں میں سندھ کو بدحالی کی طرف دھکیل دیا، شریف برادران اپنی ذات کے علاوہ کسی سے مخلص نہیں۔

وزیراعلیٰ پنجاب کے معاون خصوصی کا کہنا تھا کہ عمران خان کے اقتدار میں رہتے ہوئے اپوزیشن کو جیل کی ہوا لازمی کھانی پڑے گی۔انہوں نے کہا کہ اپوزیشن کا سارا وقت روٹھنے اور منانے میں گزر گیا، اپوزیشن سازشی اور لوٹ مار کی سیاست پر یقین رکھتی ہے۔

حسان خاور کا کہنا تھا کہ ہمارے اتحادی ہمارے ساتھ کھڑے ہیں، چوہدری برادران منجھے ہوئے سیاستدان اور حکومت کے اہم اتحادی ہیں۔انہوں نے کہا کہ پہلے بھی ن لیگ نے سیاسی جماعتوں سے کئے وعدے کبھی وفا نہیں کئے، وزیشن کو معلوم ہے کہ کہیں سے بھی ڈیل اور ڈھیل نہیں ملنے والی۔

معاون خصوصی حسان خاور نے مزید کہا کہ اپوزیشن 2023 کے الیکشن کی تیاری کرے، تب تک اسی تنخواہ پر گزارا کرنا پڑے گا۔