وفاقی وزیر مذہبی امور کی جانب سے عورت مارچ پر پابندی کے معاملے کو وفاقی وزیراطلاعات فواد چوہدری نے مسترد کر دیا ہے۔

نجی چینل سے گفتگو کرتے ہوئے وفاقی وزیر اطلاعات فواد چوہدری کا کہنا تھا عورت مارچ پر پابندی کا مطالبہ سمجھ سے بالاتر ہے۔ فواد چوہدری نے کہا کہ جمہوری ریاست میں مختلف نظریات رکھنے والے لوگ ہوتے ہیں، ان کی اپنی سرگرمیاں ہوتی ہیں، ان کو روکا نہیں جا سکتا، اور نہ ہی انہیں روکا جانا چاہیے۔ وفاقی وزیر اطلاعات نے مزید کہا کہ کیا پہننا ہے کیا نہیں پہننا یہ فیصلہ حکومت کو نہیں بلکہ معاشرے کو کرنا چاہیے، ورنہ وہی ہو گا جو بھارت میں ہو رہا ہے۔

فواد چوہدری نے مزید کہا کہ حکومت کو ایسے معاملات میں پارٹی نہیں بننا چاہیے، انہوں نے وفاقی وزیر برائے مذہبی امور کے عورت مارچ کے نعروں پر اعتراضات کے متعلق کہا کہ سوشل میڈیا پر چلنے والے عورت مارچ کے نعرے زیادہ تر فوٹو شاپ کئے گئے تھے، کیونکہ بعد ازاں تحقیق سے پتا چلا تھا کہ عورت مارچ میں تو ایسے پلے کارڈز موجود ہی نہیں تھے۔

یاد رہے کہ وفاقی وزیر برائے مذہبی امور پیر نورالحق قادری نے وزیراعظم کو خط لکھ کر عورت مارچ پر پابندی کا مطالبہ کیا ہے۔