بلوچستان کے ضلع کوہلو میں دہشت گردوں کی فائرنگ سے کیپٹن حیدر عباس شہید ہوگئے۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے دہشت گردوں کی موجودگی کی اطلاع پر علاقے کا محاصرہ کیا تو ملک دشمنوں کی جانب سے فائرنگ کر دی گئی، فائرنگ کے تبادلے اور دہشت گردوں کے تعاقب میں  کیپٹن حیدر عباس نے جام شہادت نوش کیا تھا۔

آئی ایس پی آر کا کہنا ہے کہ دہشت گردوں کو بلوچستان کا امن سبوتاژ کرنے کی اجازت نہیں دی جائے گی، اور دہشت گردوں کے خاتمے کیلئے سیکیورٹی فورسز کی کارروائیاں جاری رہیں گی۔

آئی ایس پی آر کے مطابق سیکیورٹی فورسز کی فائرنگ سے دہشت گرد زخمی ہونے کے باوجود قریبی پہاڑوں میں فرار ہوگئے جن کی تلاش کا سلسلہ جاری ہے۔

دوسری جانب شہید ہونے والے کیپٹن حیدر عباس کی نمازجنازہ ادا کردی گئی جس میں کور کمانڈر کراچی لیفٹیننٹ جنرل محمد سعید نے بھی شرکت کی۔ جام شہادت نوش کرنے والے کیپٹن حیدر عباس کو مکمل فوجی اعزاز کے ساتھ سپرد خاک کیا گیا۔ کیپٹن عباس شہید کا تعلق سپیشل سروسز گروپ سے تھا۔