ٹیکسٹائل کی برآمدات میں رواں مالی سال کے پہلے 7 ماہ کے دوران گزشتہ سال کی اسی مدت کے مقابلے میں 24.73 فیصد اضافہ ریکارڈ کیا گیا ہے۔
اسلام آباد – (اے پی پی): پاکستان بیورو آف شماریات (پی بی ایس) کے اعداد و شمار کے مطابق جولائی تا جنوری (22۔2021ء ) میں ٹیکسٹائل کی برآمدات 10,933.446 ملین ڈالر ریکارڈ کی گئیں جو کہ جولائی تا جنوری (21۔2020ء ) کے مقابلے میں 24.73 فیصد اضافہ ہے۔ جولائی تا جنوری (21۔2020ء ) کے دوران یہ برآمدات 8,765.883 ملین ڈالر ریکارڈ کی گئی تھیں۔ ٹیکسٹائل اشیاء جنہوں نے تجارتی نمو میں حصہ ڈالا ان میں کاٹن یارن بھی شامل ہے جس کی برآمدات گزشتہ سال 486.429 ملین ڈالر سے 41.41 فیصد بڑھ کر رواں سال 687.857 ملین ڈالر تک پہنچ گئیں۔
اسی طرح خام روئی کی برآمدات 782.46 فیصد بڑھ کر 0.593 ملین ڈالر سے 5.233 ملین ڈالر، سوتی کپڑے کی برآمدات 24.41 فیصد اضافے سے 1,086.333 ملین ڈالر سے 1,351.532 ملین ڈالر، کاٹن کی برآمدات گزشتہ سال سے 100 فیصد بڑھ کر 5.51 ملین ڈالر تک پہنچ گئیں۔
مزید برآں، بیڈ وئیر کی برآمدات 1,613.510 ملین ڈالر سے بڑھ کر 1,924.057 ملین ڈالر ہوگئیں جو کہ 19.25 فیصد اضافے کو ظاہر کرتی ہیں، تولیے کی برآمدات 15.41 فیصد بڑھ کر 533.206 ملین ڈالر سے 615.354 ملین ڈالر، ریڈی میڈ گارمنٹس 21.981 ملین ڈالر سے بڑھ کر 1,924.057 ملین ڈالر ہوگئی۔
دریں اثنا سال بہ سال کی بنیاد پر، گزشتہ سال کے اسی مہینے کے مقابلے جنوری 2021ء کے مہینے کے دوران ٹیکسٹائل کی برآمدات میں 17.29 فیصد کا اضافہ ہوا۔ جنوری 2021ء کے دوران برآمدات 1,552.297 ملین ڈالر ریکارڈ کی گئیں جبکہ جنوری 2020 کے دوران 1,323.455 ملین ڈالر کی برآمدات تھیں۔
ماہ بہ ماہ کی بنیاد پر، جنوری 2021ء کے دوران ملک سے ٹیکسٹائل کی برآمدات میں 4.38 فیصد کی کمی دیکھی گئی جب کہ دسمبر 2021 میں 1,623.426 ملین ڈالر کی برآمدات تھیں۔
