بلوچستان کے ممتاز قوم پرست سیاستدان ڈاکٹر عبدالحئی بلوچ ٹریفک حادثے میں جاں بحق ہوگئے۔
تفصیلات کے مطابق جاں بحق سیاسی رہنما کے بیٹے کا کہنا ہے کہ عبدالحئی کوئٹہ سے لاہور جاتے ہوئے حادثے کا شکار ہوئے، میت پہاولپور سےآبائی علاقے بھاگ کیلئے روانہ کردی گئی ہے، ان کی نماز جنازہ کل ادا کی جائےگی، وہ رکن قومی اسمبلی، سینیٹر، بلوچستان نیشنل موومنٹ اور نیشنل پارٹی سے وابستہ رہے۔ عبدالحئی کےانتقال پر وزیراعلیٰ بلوچستان، چیئرمین سینیٹ اورسابق صدرآصف زرداری نے اظہار تعزیت کیا ہے۔
ڈاکٹر عبدالحئی بلوچ یکم فروری 1946 کو بولان کے علاقے بھاگ میں پیدا ہوئے،انہوں نے ڈاؤ میڈیکل کالج کراچی سے ایم بی بی ایس کیا، وہ پیشہ کے لحاظ سے ڈاکٹر تھے تاہم زیادہ تر سیاست میں سرگرم رہے، اپنے سیاسی سفر کا آغاز بلوچ اسٹوڈنٹس آرگنائزیشن سے کیا اور بی ایس او کے پہلے چیئرمین رہے، وہ 1970 کے عام انتخابات میں نیشنل عوامی پارٹی کے ٹکٹ پر رکن قومی اسمبلی منتخب ہوئے، بلوچستان نیشنل موومنٹ اور نیشنل پارٹی سے وابستہ اور سینیٹ کے رکن بھی رہے۔
انہوں نے کچھ عرصہ قبل نیشنل ڈیمو کریٹک پارٹی کےنام سے نئی سیاسی جماعت قائم کی تھی، قوم پرست سیاست دان اور شعلہ بیاں مقرر تھے، انہیں عوامی اور سماجی حلقوں میں کافی پزیرائی حاصل تھی۔
انہیں 2016 میں آرٹس کونسل کی جانب سے جالب امن ایوارڈ بھی دیا گیا۔
