پنجاب حکومت کے ترجمان حسان خاور نے کہا ہے کہ ق لیگ یقین دہانی کروا چکی ہے کہ حکومت کے خلاف کچھ نہیں کر رہے۔

وزیراعلیٰ پنجاب کے معاون خصوصی برائے  اطلاعات حسان خاور نے لاہور میں میڈیا سے گفتگو کرتے ہوئے کہا کہ بہت جلد لاہور کے شہری جشن بہاراں کی روشنی دیکھیں گے، لاہور کے شہری پورے پاکستان کی جھلک دیکھ سکیں گے۔انہوں نے کہا کہ یکم مارچ سے تقریبات کا باقاعدہ آغاز ہوجائے گا، اس تقریب میں خواتین کے عالمی دن اور مشاعرہ کا اہتمام بھی کیا جائے گا۔

حسان خاور نے کہا کہ 13 مارچ کو کبڈی معرکہ ہو گا، 15 مارچ کو گریٹر اقبال پارک میں نمائش کا اہتمام کیا جائے گا اور 19مارچ کو باغ جناح میں پروگرام کا بھی انعقاد کیا جائے گا۔پنجاب حکومت کے ترجمان کا کہنا ہے کہ تحریک عدم اعتماد کے حوالے سے صرف شور مچایا  جا رہا ہے، پیپلز پارٹی اور ن لیگ خان صاحب کی دشمنی میں متحد ہیں، یہ سمجھ رہے ہیں کہ ان کا وقت قریب ہے، اپوزیشن کے نمبر پورے نہیں ہیں۔

انہوں نے مزید کہا کہ ق لیگ یقین دہانی کروا چکی ہے کہ حکومت کے خلاف کچھ نہیں کر رہے، ق لیگ جانتی ہے کہ ن لیگ نے ماضی میں ان کے ساتھ کیا کیا، سیکیورٹی کے حوالے سے سخت اقدامات کیے جائیں گے اور اس سارے ڈرامے کے بعد اپوزیشن ناکام ہو گئی ہے۔