شہباز شریف نے کہا ہے کہ عوامی جلسوں میں فوج کے اداروں کے سربراہوں کے خلاف نعرے لگانا نہ صرف قومی مفاد کے خلاف ہے بلکہ اس کی اجازت نہیں ہونی چاہیے۔
لاہور میں میڈیا سے بات کرتے ہوئے شہباز شریف نے کہا ہے کہ فیصل آباد میں پاکستان ڈیموکریٹک موومنٹ (پی ڈی ایم) جلسے میں نعرے جس نے لگائے اس کا ہماری پارٹی سے کوئی تعلق نہیں ہے، نہ وہ ہماری پارٹی کا کارکن ہے، نہ وہ ہماری پارٹی کا عہدیدار ہے۔ان کا کہنا تھا کہ کسی بھی ملک کے دفاع ، سلامتی اور امن کے لیے ایک مضبوط فوج لازم و ملزوم ہے ۔ ان کا کہنا تھا کہ البتہ یہ ضرورت ہے کہ اس تناظر میں افواج پاکستان کے اداروں کے سربراہ اور افواج پاکستان کے جو بھی ادارے ہیں، ان کے سربراہوں کے خلاف عوامی جلسوں میں نعرے لگانا نہ صرف قومی مفاد کے خلاف بلکہ اس کی قطعاً کوئی اجازت نہیں ہونی چاہیے۔مزیدانہوں نے کہا کہ ادارے کے اندر تعیناتیاں اور تبدیلیاں ہونا اس ادارے کے روٹین کا کام ہے، اس پر ہمیں کسی کو مداخلت کی نہ ضروت ہے، نہ ہوئی اور ہونی بھی نہیں چاہیے۔
مہنگائی پاکستان کا سب سے بڑا مسئلہ ہے
شہباز شریف نے کہا مہنگائی اس وقت پاکستان کا نمبر ون مسئلہ ہے اور اس کمر توڑ مہنگائی کے خلاف اپوزیشنعوام کیلئے نکل چکی ہے۔ انہوں نے کہا کہ پورے پاکستان میں مہنگائی نے عوام کا برا حال کردیا ہے، بےروزگاری عروج پر ہے اور عام آدمی کو اپنا گزارہ کرنا مشکل ہورہا ہے، آئے دن مہنگائی کے بم عوام پر گرائے جارہے ہیں۔
حکومت نے پارلیمنٹ کو بند کر دیا ہے
پارلیمنٹ ہی ہے جو آئین کی حکمرانی کی ضمانت ہوتی ہے، پارلیمنٹ ہے جہاں تمام موضوع زیر بحث لائے جاتے ہیں، پارلیمنٹ ہی ہے جہاں خارجہ اور داخلہ کے معاملات، مہنگائی اور بے روزگاری پر بات ہوتی ہے۔انہوں نے کہا کہ ‘پارلیمنٹ ہی ہے جہاں قانون سازی ہوتی ہے لیکن سوا تین سال ہوگئے اس حکومت نے پارلیمنٹ کو لاک کر رکھا ہے، ہر چیز صدارتی آرڈیننس سے چلائی جارہی ہے۔