آرمی چیف جنرل قمر جاوید باجوہ نے کہا ہے کہ بلوچستان کا امن اور خوشحالی اولین ترجیح ہے، بلوچستان میں سماجی و اقتصادی منصوبوں کیلئے پرامن ماحول فراہم کرنے کی ہر ممکن کوشش کرینگے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نےمنگل کے روز بلوچستان کے علاقے تربت کا دورہ کیا ۔ تربت پہنچنے پر کور کمانڈر کوئٹہ لیفٹیننٹ جنرل سر فراز علی نے آرمی چیف کا استقبال کیا۔
آرمی چیف کو بلوچستان کی سیکیورٹی صورتحال اور بارڈر مینجمنٹ کے متعلق بریفنگ دی گئی۔ اس دوران انہوں نے فورسز کے دہشت گردوں کے خلاف آپریشنز کو سراہا ۔
آئی ایس پی آر کے مطابق آرمی چیف نے تربت یونیورسٹی کا بھی دورہ کیا ،تربت یونیورسٹی کے طلبہ اور ضلع کیچ سے تعلق رکھنے والے قبائلی عمائدین ،وکلا اور خواتین سے بھی ملا قاتیں کیں۔ اس موقع پر انہوں نے کہا کہ بلوچستان کے نوجوان بہت باصلاحیت ہیں، علاقے کی سلامتی، تعلیم، ہنرمندی کی ترقی کیلئے دستیاب بھر پور فائدہ اٹھانا چاہیے۔ آرمی چیف نے اس بات کا عزم کیا کہ بلوچستان کا امن، خوشحالی اولین ترجیح ہے، صوبے میں سماجی و اقتصادی منصوبوں کے لیے پرامن ماحول فراہم کرنے کیلئے ہر ممکن کوشش کررہیں ہیں ۔
آرمی چیف کا کہنا تھا کہ بلوچستان کی عوام نے ترقی، استحکام کیلئے بڑی قربانیاں دی ہیں، قومی یکجہتی کے ذریعے بلوچستان کی عوام کی حقیقی صلاحیتوں کو بروئے کار لایا جائے گا۔
