متحدہ اپوزیشن کی طرف سے وزیراعظم کیخلاف تحریک عدم اعتماد لانے کے اعلان کے بعد عمران خان بھی مقابلے کرنے کے لیے سیاسی محاذ پر متحرک ہو گئے ہیں۔
زرا ئع کے مطابق وزیراعظم عمران خان سے وفاقی وزیر آبی وسائل مونس الہی نے ملاقات کی جس میں ملکی سیاسی امور اور اتحاد کے معاملات پر بات چیت کی گئی،اس موقع پر مونس الٰہی نے کہا کہ حکومت کے ساتھ ہیں آگے بھی ملکر ساتھ چلنا ہے،سیاسی منظر نامے پر ساتھ ساتھ چلنا ہے۔
دوسری جانب اتحاد کے معاملات پر کوارڈینیشن کی ذمہ داری وفاقی وزیر اسد عمر کو سونپ دی گئی، اسد عمر سیاسی معاملات پر مسلم لیگ ق کی قیادت کے ساتھ رابطے میں رہیں گے۔
یاد رہے کہ چند روز قبل وزیراعظم عمران خان نے چودھری برادران کے گھر جا کر چودھری شجاعت حسین اور چودھری پرویز الٰہی سے ملاقات کی تھی جس میں مسلم لیگ ق کے قائدین وزیراعظم کے ساتھ ڈٹ کر کھڑے رہنے کا اعلان کیا تھا۔
خیال رہے ترجمان ق لیگ نے دعویٰ کیا تھا کہ وزارت اعلیٰ دروازے پر دستک دے رہی ہے ، سیاستدان وقت کے مطابق فیصلہ نہ کرے تو قیمت چکانا پڑتی ہے۔
