پاکستان اور ازبکستان کے مابین افغانستان کے راستے ٹرین سروس پر اتفاق ہوا ہے جو وسطی ایشیائی ریاستوں کو گوادر پورٹ سے ملائے گی۔
اسلام آباد – (اے پی پی): پاکستان اور ازبکستان کے درمیان مختلف معاہدوں پر دستخط کے بعد وزیراعظم عمران خان اور ازبکستان کے صدر شوکت مرزایوف نے اسلام آباد میں مشترکہ پریس کانفرنس کی۔ پریس کانفرسن میں وزیراعظم عمران خان نے کہا کہ ہم ازبکستان کے ساتھ دیرینہ تعلقات کو مستحکم کر رہے ہیں۔ انہوں نے کہا کہ گزشتہ ایک سال میں پاکستان اور ازبکستان کے مابین تجارت میں 50 فیصد جبکہ مشترکہ منصوبوں میں پانچ گنا اضافہ ہوا ہے۔ اس کے علاوہ دونوں ملکوں کے کاروباری افراد کے مابین بھی روابط بڑھے ہیں۔
وزیراعظم نے کہا کہ ہم نے ازبکستان کے ساتھ افغانستان کے راستے روابط بڑھانے کا فیصلہ کیا ہے، اس سے دونوں ملکوں کے مابین سیاحت اور تجارت میں اضافہ ہو گا۔ وزیراعظم نے کہا کہ ٹرین رابطوں پر بھی اتفاق ہوا ہے۔ وزیراعظم نے کہا کہ دونوں ملکوں کے مابین افغانستان کے راستے ٹرین چلے گی جو وسطی ایشیائی ریاستوں کو گوادر پورٹ سے ملائے گی۔ عمران خان نے کہا کہ افغانستان کے راستے کنکٹویٹی کا فائدہ نہ صرف ازبکستان اور پاکستان کو ہو گا بلکہ زیادہ فائدہ افغانستان کو ہو گا۔
اقوام متحدہ کشمیریوں کو حق خود ارادیت کا حق دے، وزیراعظم
وزیراعظم نے کہا کہ میں نے ازبک صدر کو مقبوضہ کشمیر کی صورتحال اور پاکستان کے مؤقف سے آگاہ کیا، ہم چاہتے ہیں کہ اقوام متحدہ سلامتی کونسل کی قراردادوں پر عملدرآمد کرتے ہوئے کشمیری عوام کو حق خود ارادیت کا حق دے اور وہاں بھارتی مظالم کو روکے۔
"کشمیر کے حوالے پاکستان کا موقف ازبک صدر کے سامنے رکھا،"
وزیراعظم عمران خان اور ازبک صدر کی مشترکہ پریس کانفرنس#WelcomeUzbekPresident pic.twitter.com/Y5LAyr8CcQ
— Prime Minister's Office, Pakistan (@PakPMO) March 3, 2022
ناموس رسالت پر مسلم ممالک کو مہم چلانی چاہیے، وزیراعظم
وزیراعظم نے کہا کہ اسلامو فوبیا کے حوالے سے ازبکستان اورپاکستان کا یکساں مؤقف ہے۔ انہوں نے کہا کہ مغربی ممالک کے دو سربراہان نے بھی ہمارے مؤقف کی تائید کی ہے۔روس کے صدر ولادی میر پیوٹن اور کینیڈا کے وزیراعظم جسٹن ٹروڈو نے بھی کہا ہے کہ پیغمبرﷺ کی شان میں گستاخی کو کسی صورت بھی اظہار رائے کی آزادی قرار نہیں دیا جا سکتا۔ انہوں نے کہا کہ ناموس رسالتﷺ پر مسلم ممالک کو مل کر مہم چلانی چاہئے۔
“اسلامو فوبیا کے خلاف پاکستان اور ازبکستان کا موقف یکساں ہے،”
وزیراعظم عمران خان اور ازبک صدر کی مشترکہ پریس کانفرنس#WelcomeUzbekPresident pic.twitter.com/ohEs9riNFS
— Prime Minister’s Office, Pakistan (@PakPMO) March 3, 2022
افغانستان کی صورتحال کے حوالہ سے وزیراعظم نے کہا کہ پاکستان اور ازبکستان ، افغانستان کے منجمد اثاثوں کی بحالی کیلئے مل کر کام کریں گے۔
نیا پاکستان اور نیا ازبک پروگرام میں بڑی مماثلت پائی جاتی ہے، ازبک صدر
ازبکستان کے صدر شوکت مرزایوف نے مہمان نوازی پر پاکستان کے عوام اور قیادت کا شکریہ ادا کرتے ہوئے کہا کہ پاکستان آنے کا بڑی شدت سے انتظار تھا لیکن کورونا کی وجہ سے تاخیر ہوئی۔ انہوں نے کہا کہ پاکستان کے ساتھ سٹرٹیجک تعاون کے فروغ کیلئے کام کر رہے ہیں۔ انہوں نے کہا کہ وزیراعظم عمران خان کے ساتھ دوطرفہ، علاقائی و بین الاقوامی امور پر گفتگو تعمیری رہی۔ ازبک صدر نے کہا کہ پاکستان کی سیاسی اور ثقافتی ترقی کو قدر کی نگاہ سے دیکھتے ہیں۔ انہوں نے کہا کہ وزیراعظم عمران خان کے پروگرام نیا پاکستان اور ازبکستان کا نیا ازبک پروگرام میں بڑی مماثلت پائی جاتی ہے۔دونوں ملکوں نے ثقافتی شعبوں کی بحالی کیلئے مل کر کام کرنے پر بھی اتفاق کیا ہے۔ انہوں نے کہا کہ پاکستان اور ازبکستان کے مابین اقتصادی اور تجارتی تعلقات تیزی سے فروغ پا رہے ہیں جبکہ ان شعبوں میں تعلقات کو مزید وسعت دینے اور مستحکم کرنے کی صلاحیت موجود ہے۔ ترجیحی تجارتی معاہدہ دونوں ملکوں کے مابین تعلقات کو مضبوط بنانے کا موقع فراہم کرتا ہے۔
شوکت مرزایوف نے کہا کہ وسطی ایشیاء سے مزار شریف، کابل اور پشاور ریلوے کی تعمیر پر مستقبل قریب میں کام شروع ہو گا، اس منصوبے سے وسطی ایشیاء گوادر پورٹ سے منسلک ہو گا۔ازبک صدر نے کہا کہ وزیراعظم کے ساتھ ملاقات میں علاقائی سلامتی کا معاملہ بھی زیر بحث لایا گیا۔ ازبک صدر نے افغانستان کی بگڑتی صورتحال پر تشویش کا اظہار کرتے ہوئے عالمی برادری سے مطالبہ کیا کہ وہ انسانی بنیادوں پر افغانستان کے منجمد اثاثے بحال کرے اور افغانستان کو انسانی ہمدردی کی بنیاد پر مدد فراہم کرنا چاہئے۔ شوکت مرزایوف نے کہا کہ دونوں ملکوں نے سائنس، تعلیم، مذہبی سیاحت، سینما، انفارمیشن سمیت مختلف شعبوں میں تعلقات کو مزید مستحکم کرنے پر اتفاق کیا ہے۔
اس کے علاوہ آج ہم نے 10 انتہائی اہم معاہدوں پر بھی دستخط کئے ہیں جو دونوں ملکوں کی ترقی کا باعث بنیں گے۔ ازبک صدر نے کہا کہ ٹرانزٹ معاملات کو حل کرنے کیلئے معاہدے کئے گئے ہیں۔
