وزیراعظم عمران خان  نے کہا ہے کہ اپوزیشن کو عدم اعتماد کا بخار چڑھا ہوا ہے، حکومت کو کوئی خطرہ نہیں عدم اعتماد والے شوق پورا کر لیں۔

وزیراعظم عمران خان کی زیر صدارت  پی ٹی آئی کی کور کمیٹی کا اجلاس  منعقد ہوا۔ اجلاس میں ملکی سیاسی صورتحال کا جائزہ لیاگیا۔اجلاس میں شاہ محمود قریشی، اسد عمر، پرویز خٹک، بابر اعوان، گورنر کے پی کے، گورنر سندھ اور گورنر پنجاب نے شرکت کی۔مشیر پارلیمانی امور ڈاکٹر بابر اعوان نے اجلاس میں قانونی امور پر بریفنگ دی۔ذرائع کا کہنا ہے کہ وزیراعظم عمران خان اجلاس کے دوران پر اعتماد نظر آئے۔

وزیر اعظم  نے اجلاس میں  کہا ہے کہ چوروں کا ایجنڈا ناکام بنا دیں گے،عدم اعتماد والے شوق پورا کر لیں، ہماری تیاری مکمل ہے۔انہو ں نے  کہا ہے  کہ جمہوری حکومت کو کوئی خطرہ نہیں۔جن کو مقدمات سے خطرہ ہے وہ لوٹی ہوئی دولت سے انقلاب نہیں لا سکتے۔وزیراعظم عمران خان  نے اجلاس میں جنوبی پنجاب صوبہ کا بل قومی اسمبلی لانے کا فیصلہ بھی کیا ہے۔