وزیراعظم عمران خان نے سندھ میں پی ٹی آئی کے حالیہ مارچ کی طرز کا دورہ کرنے کا اعلان کیا ہے۔

کراچی گورنر ہاؤس میں تقریب سے خطاب کرتے ہوئے وزیراعظم عمران خان نے کہا کہ علی زیدی اور ان کی ٹیم کے دورے سے یہ بات واضح ہوگئی ہے کہ سب سے زیادہ تبدیلی کی ضرورت سندھ میں ہے۔

انہوں نے کہاکہ سندھ کے لوگ ڈاکو زرداری سے آزادی چاہتے ہیں، علی زیدی اور شاہ محمود  قریشی کے بعد میں بھی سندھ کا ویسا ہی دورہ کروں گا۔ ان کا کہنا تھا کہ میں اندرون سندھ کے لوگوں کو خاص طور پر یہ  پیغام دینا چاہتا ہوں کہ آزادی کا وقت آگیا ہے۔

اندرون سندھ کا دورہ کرنے خود آ رہا ہوں، وقت آ گیا ہے کہ سندھ کو زرداری مافیا سے آزادی دلائی جائے۔ وزیراعظم عمران خان pic.twitter.com/u1FLoVhO1k

— PTI (@PTIofficial) March 9, 2022

وزیراعظم نے کہا کہ کراچی کے لوگوں کو کراچی سرکلر ریلوے کی مبارکباد دیتا ہوں،کسی وفاقی حکومت نے کراچی میں وہ کام نہیں کئے جو ہم کرنے جارہے ہیں۔

وزیراعظم کا تحریک عدم اعتماد کے متعلق کہنا تھا کہ یہ ناکام ہوں گے، لیکن انہیں نہیں پتا کہ کپتان نے اس کے بعد کی بھی تیاری کی ہوئی ہے۔انہوں نے کہا کہ اس وقت میری بندوق کی نالی پر جو ڈاکو آیا ہوا ہے، وہ زرداری ہے، اس نے پولیس کو استعمال کر کے جو سندھ کی عوام پہ ظلم کیا ہے، میں ان سے سندھ کو نجات دلاؤں گا۔