پیپلز پارٹی کے شریک چیئرمین آصف علی زرداری کا پارلیمنٹ لاجز میں پولیس کے آپریشن پر ردعمل سامنے آیا ہے۔

پیپلز پارٹی کے شریک چیئرمین آصف علی زرداری نے کہا ہے کہ یہ حکومت آخری ہچکیاں لے رہی ہے، پولیس افسر اور انتظامیہ اس کٹھ پتلی کے غیرقانونی حکم پرعمل نہ کریں۔

اپنے بیان میں آصف علی زرداری کا کہنا تھا کہ کٹھ پتلی وزیراعظم خوف اور دہشت کے ذریعے اراکین پارلیمنٹ کو ہراساں کر رہے ہیں، صرف جمعیت علمائے اسلام (ف) کے اراکین نہیں بلکہ اپوزیشن کے تمام اراکین اسمبلی ارکان کو ڈرانےکی کوشش کی جارہی ہے۔

انہوں نے کہا کہ اراکین اسمبلی اپنے حوصلے بلند رکھیں، اور ان ہتھکنڈوں کا ڈٹ کر مقابلہ کریں۔

یاد رہے کہ آج پارلیمنٹ لاجز میں جمعیت علمائے اسلام کے محافظ دستے انصار الاسلام کے کارکنوں کی موجودگی پر اسلام آباد پولیس نے آپریشن کرکے رکن قومی اسمبلی سمیت متعدد افراد کو گرفتار کر لیا ہے۔