وزیرِ اعظم عمران خان سے ملاقات کے لیے علماء کا وفد بنی گالا پہنچ گیا جہاں علمائے کرام کی وزیرِ اعظم عمران خان سے ملاقات ہوئی ہے۔
وزیراعظم عمران خان اجلاس میں علمائے کرام کو اعتماد میں لیں گے اور کالعدم جماعت کے مظاہرے اور مطالبات پر بات کریں گے۔واضح رہے کہ کالعدم تنظیم کے حوالے سے وزیرِ اعظم عمران خان نے 25 سے زائد علمائے کرام کے وفد کو آج بلایا ہے۔وزیرِ اعظم عمران خان موجودہ صورتِ حال پر علماء سے مشاورت کریں گے، وہ علماء کو حکومتی حکمتِ عملی سے آگاہ بھی کریں گے۔ اور انہیں رحمت اللعالمین ﷺاتھارٹی کے بارے بھی آگاہ کیا جائے گا۔اجلاس میں بریفنگ دینے کے لیے وفاقی وزیر داخلہ شیخ رشید، وزیراطلاعات فواد چودھری سمیت دیگر موجود ہیں۔
خیال رہے کہ کالعدم ٹی ایل پی نے 12 ربیع الاول کے روز سے اپنے احتجاج کا دائرہ وسیع کیا ہے۔ ابتدائی طور پر تنظیم نے ملتان اور لاہور میں دھرنے دیے جس کے بعد اسلام آباد کی طرف مارچ کا اعلان کیا گیا۔انتظامیہ نے مظاہرین کو اسلام آباد پہنچنے سے روکنے کیلئے اہم سڑکیں بند کردی ہیں جب کہ مظاہرین نے گزشتہ کئی روز سے جی ٹی روڈ پر دھرنا دیا ہوا ہے جس کی وجہ سے ٹرانسپورٹ سروس معطل ہے۔
راولپنڈی میں سکیورٹی کے سخت انتظامات ہیں، اسلام آباد اور راولپنڈی کو ملانے والی مرکزی شاہراہیں سیل کردی گئی ہیں۔ صدر سے فیض آباد میٹرو سروس معطل ہے۔
