لاہور کے علاقے گلبرگ کے شاپنگ پلازہ میں لگی آگ پر7 گھنٹے بعد جزوی طور پر قابو پالیا گیا ہے۔
ریسکیو حکام کے مطابق پلازے میں لگی آگ نے دیکھتے ہی دیکھتے ایک کے بعد دوسرے فلور کو اپنی لپیٹ میں لے لیا، اور چار فلورز تک پھیل گئی۔
شاپنگ پلازہ میں 400 کے قریب دکانیں تھیں، جن میں سے زیادہ تر دکانیں موبائل فونز، الیکٹرانکس اور ریڈی میڈ گارمنٹس کی تھیں، آگ کے باعث شاپنگ پلازہ میں کروڑوں روپے مالیت کا سامان جل کر راکھ ہو گیا ہے۔
ریسکیو حکام کا کہنا ہے کہ پلازے میں لگی آگ کو بجھانے کیلئے آپریشن میں فائر بریگیڈ کی 25 سے زائد گاڑیوں اور 60 کے قریب ریسکیو اہلکاروں نے حصہ لیا۔
ڈپٹی کمشنر لاہور عمر شیر چیمہ نے بتایا ہے کہ پلازے میں آگ پر جزوی قابو پا لیا گیا ہے اور کولنگ کا عمل جاری ہے۔
نجی شاپنگ مال پیس میں لگنے والی آگ پر قابو پا لیا گیا ہے. ریسکیو 1122، فائر بریگیڈ کے عملہ نے عمدہ کام کیا. خطر ناک لگی ہوئی آگ پر مہارت سے قابو پایا. میں نے مسلسل آگ بجھانے کے عمل کی خود نگرانی کی. pic.twitter.com/qxEdmgLMV2
— Deputy Commissioner Lahore (@DCLahore) March 14, 2022
ڈپٹی کمشنر لاہور عمر شیر کا کہنا ہے کہ واقعے کی مکمل تحقیقات کی جائیں گی، جبکہ دوسری جانب پولیس نے ریسکیو آپریشن میں رکاوٹ ڈالنے کے الزام میں پلازے کے سکیورٹی انچارج اور ایک ملازم کو حراست میں لے لیا ہے۔
پلازے کے دکانداروں کا کہنا ہے کہ مالکان پلازہ خالی کروانا چاہتے تھے، آگ لگائی گئی ہے، شارٹ سرکٹ نہیں ہوا۔
وزیراعلیٰ پنجاب عثمان بزدار نے گلبرگ کے پلازہ میں آگ لگنے کے واقعے کا نوٹس لیتے ہوئے تحقیقات کا حکم دے دیا ہے۔
