وفاقی وزیر اطلاعات فواد چوہدری نے اپوزیشن جماعتوں کو وزیراعظم کے خلاف تحریک عدم کا مشورہ دیا ہے۔

نجی چینل کے ساتھ انٹرویو میں وفاقی وزیر اطلاعات فواد چوہدری نے کہا کہ ہمارے ڈی چوک کے جلسے میں 10 لاکھ افراد اکٹھے ہوں گے، جو اپوزیشن جماعتوں کیخلاف ایک ریفرنڈم ہو گا۔

وفاقی وزیر نے کہا کہ پنجاب میں مقابلہ (ن) لیگ اور پی ٹی آئی کا ہے، پنجاب میں پیپلز پارٹی کا کوئی چانس نہیں۔

فواد چوہدری نے کہا کہ تحریک عدم اعتماد کے بعد سے حکومت اور اپوزیشن جماعتوں میں بہت تلخیاں پیدا ہو گئی ہیں، زبان میں بھی تلخیاں پیدا ہو چکی ہیں، انہوں نے کہا کہ ایسا نہ ہو ووٹنگ کے دن تلخیاں اتنی بڑھ چکی ہوں جس کا نقصان پاکستان کو ہو۔

اس موقع پر فواد چوہدری نے اپوزیشن کو مشورہ دیتے ہوئے کہا اپوزیشن تحریک عدم اعتماد واپس لے، پھر دیکھتے ہیں کہ انہیں بدلے میں کیا دیا جا سکتا ہے۔

یاد رہے کہ حکومتی وزراء کی جانب سے نمبر گیم پوری اور اتحادی کی حمایت کا یقین دلاتے ہوئے کہا جاتا رہا ہے کہ اپوزیشن کی تحریک عدم اعتماد کا بھر پور مقابلہ کریں گے،لیکن حکومت کی جانب سے پہلی بار اپوزیشن جماعتوں کو تحریک عدم اعتماد واپس لینے کا مشورہ دیا گیا ہے۔