وفاقی وزیر دفاع پرویز خٹک نے کہا ہے کہ اسٹیبلشمنٹ اور حکومت الگ الگ نہیں، ان دونوں نے ایک ساتھ چلنا ہوتا ہے۔

اسلام آباد میں انسداد دہشتگردی عدالت میں پیشی کے بعد میڈیا سے گفتگو کرتے ہوئے وفاقی وزیر دفاع پرویز خٹک نے کہا کہ یہ تمام لوگ صرف عمران خان کے خلاف اکٹھے ہوئے ہیں۔ انہوں نے کہا کہ پتا نہیں آپ کو کیوں نظر آرہا ہے کہ حکومت جا رہی ہے؟ میں آپ کو یقین سے کہتا ہوں کہ حکومت کہیں نہیں جارہی، تمام اتحادی ہمارے ساتھ ہیں اور وہ ساتھ ہی رہیں گے۔

پریس کانفرنس کے دوران صحافی نے سوال کیا کہ آپ کے ماتحت ادارے واقعی نیوٹرل ہوگئے ہیں؟ اس پر وزیر دفاع نے کہا کہ اسٹیبلشمنٹ اور حکومت الگ الگ نہیں، ان دونوں نے ایک ساتھ چلنا ہوتا ہے۔

پرویز خٹک کا کہنا تھا کہ ہفتے 20 دن میں آرمی چیف سے ملاقات ہوجاتی ہے۔

انہوں نے مزید کہا کہ عمران خان بہت زیادہ پراعتماد ہیں، ہم شرافت کی سیاست کرتے ہیں، سیاسی جماعتوں کی ملاقاتیں بھی ہوتی رہتی ہیں۔

پی ٹی آئی کے منحرف اراکین کے متعلق وفاقی وزیر دفاع کا کہنا تھا کہ جس نے پارٹی چھوڑ کر جانا ہے، وہ استعفیٰ دے دے، ورنہ اس طرح وفاداری تبدیل کرنا حلقے کی عوام سے دھوکہ ہوگا۔