انسداد دہشت گردی کی عدالت نے صدر مملکت عارف علوی، پرویز خٹک اور شاہ محمود قریشی سمیت پی ٹی آئی قیادت کو پارلیمنٹ حملہ کیس سے بری کر دیا ہے۔

اسلام آباد کی انسداد دہشت گردی کی عدالت کے جج محمد علی وڑائچ نے پارلیمنٹ حملہ کیس میں بریت کی درخواستوں پر فیصلہ سنا دیا ہے،  جس میں عدالت نے صدر مملکت عارف علوی، وزیر خارجہ شاہ محمود قریشی، وزیر منصوبہ بندی اسد عمر، وزیر دفاع پرویز خٹک اور وزیر تعلیم شفقت محمود کو بری کردیا ہے۔

علاوہ ازیں عدالت نے صوبائی وزیر خیبرپختونخوا شوکت یوسفزئی، اعجاز  چوہدری، علیم خان اور جہانگیر ترین کی بھی مقدمے سے بریت کی درخواستیں منظور کرلیں۔

عدالت میں دوران سماعت پراسیکیوشن نے ملزمان کی بریت کی درخواستوں پر کوئی مخالفت نہیں کی۔

یاد رہے کہ پارلیمنٹ حملہ کیس کا مقدمہ 30 اگست 2014ء  کو تھانہ سیکرٹریٹ میں درج کیا گیا تھا، اس مقدمے میں  وزیراعظم عمران خان پہلے ہی بری ہوچکے ہیں۔

واضح رہے کہ انسداد دہشت گردی عدالت نے کیس میں بریت کی درخواستوں پر فیصلہ محفوظ کر رکھا تھا جو آج جج محمد علی وڑائچ نے سنایا ہے۔