الیکشن کمیشن آف پاکستان نے اہم اعلامیے میں اپنا موقف واضح کردیا ۔

تفصیلات کے مطابق وزیراعظم کے خلاف عدم اعتماد کے معاملے پرالیکشن کمیشن نے اعلامیہ جاری کر دیا، اعلامیہ میں واضح کیا گیا کہ وزیر اعظم کے انتخاب اورعدم اعتماد سے الیکشن کمیشن کا کوئی تعلق نہیں،الیکشن کمیشن کے جاری کردہ اعلامیہ میں کہا گیا کہ وزیر اعظم کا انتخاب کرنا یاعدم اعتماد کی کارروائی سپیکراسمبلی سرانجام دیتے ہیں،اسپیکرقومی اسمبلی کارروائی بطور پریزائیڈنگ افسرانجام دیتے ہیں ۔

پارٹی سربراہ متعلقہ ممبر پارلیمنٹ کے انحراف کا ڈکلیریشن تحریری  طور پردے گا ، پارٹی سربراہ کاپی پریزائیڈنگ افسر، چیف الیکشن کمشنرکوارسال کرے گا، انحراف کے اعلان سے پہلے پارٹی سربراہ متعلقہ ممبر کو سننےکا موقع دے گا۔

اعلامیہ میں کہا گیا کہ الیکشن کمیشن کا کردار سپیکر کی طرف سے ڈکلیریشن کےبعد شروع ہوگا،الیکشن کمیشن ڈکلیریشن کے بعد 30 دن میں فیصلہ کریگا، اختیارات تفویض کئے جائیں تو ای سی پی فریضہ سر انجام دے سکتاہے ، الیکشن کمیشن آئین و قانون کے مطابق احسن طریقے سے کام کررہاہے ۔