پاکستان تحریک انصاف نے 27 مارچ کو اسلام آباد میں ہونے والا جلسہ ڈی چوک سے پریڈ گراؤنڈ منتقل کرنے کی وجہ بتا دی ہے۔
ذرائع کےمطابق پاکستان تحریک انصاف نے اسلام آباد انتظامیہ کوڈی چوک پر27مارچ کے جلسے کی اجازت کیلئے درخواست دی تھی، جبکہ دوسری جانب اپوزیشن نے بھی اسی جگہ جلسے کی درخواست دے رکھی ہے، لیکن اسلام آباد کی ضلعی انتظامیہ نے دونوں کو جلسے کی اجازت دینے سے انکارکرتے ہوئے متبادل مقامات تجویز کر دئیے ہیں۔
ذرائع کا کہنا ہے کہ ضلعی انتظامیہ نے حکومت کو پریڈ گراؤنڈ اور اپوزیشن کو H-9 میں جلسے کرنے کیلئے متبادل مقامات تجویز کئے ہیں، جسے حکومت نے تسلیم کر لیا ہے۔ ذرائع کے مطابق پی ٹی آئی کی جانب سے جلسے کا مقام تبدیل کرنے کے بعد اپوزیشن نے بھی رضامندی ظاہر کر دی ہے۔
دوسری جانب پاکستان تحریک انصاف کے سینیٹر فیصل جاوید نے ٹوئٹر پر جاری اپنے بیان میں کہا ہے کہ ہمارے جلسے کیلئے ویسے بھی اب ڈی چوک چھوٹی جگہ پڑ جائے گی، کیونکہ جس تعداد میں عوام آ رہے ہیں پریڈ ایونیو مناسب جگہ رہے گی۔ انہوں نے کہا کہ انشاء اللہ یہ جلسہ پاکستان کی تاریخ کا سب سے بڑا جلسہ ہو گا ، پوری قوم کا اعتماد وزیراعظم عمران خان کے ساتھ ہے، اور اپوزیشن کی شکست یقینی ہے ۔
ہمارے جلسے کے لیے ویسے بھی اب ڈی چوک چھوٹی جگہ پڑ جائے گی – جس تعداد میں عوام آ رہے ہیں پریڈ ایونیو مناسب جگہ رہے گی – یہ جلسہ پاکستان کی تاریخ کا سب سے بڑا جلسہ ہو گا انشاء اللہ – پوری قوم کا اعتماد وزیراعظم عمران خان کے ساتھ ہے – اپوزیشن کی شکست یقینی ہے انشاء اللہ
— Faisal Javed Khan (@FaisalJavedKhan) March 21, 2022
