روسی وزیر خارجہ سرگئی لارؤف کا کہنا ہے کہ امریکہ نے بھارت سے اپنا کچھ علاقہ پنٹاگون کیلئے مختص کرنے کو کہا ہے۔
تفصیلات کے مطابق روسی نشریاتی ادارے کے ساتھ انٹرویو میں روسی وزیر خارجہ سرگئی لارؤف کا کہنا تھا کہ امریکہ نے بھارت سے اپنا کچھ علاقہ پنٹاگون کیلئے مختص کرنے کو کہا ہے تاکہ اسے خطے میں مانیٹرنگ اور مخصوص مقاصدکیلئے استعمال کیا جا سکے۔ روسی وزیر خارجہ کا مزیدکہنا تھا کہ ماسکو وسطی ایشیاء میں امریکہ کے فوجوں اڈوں کا سخت مخالف ہے، انہوں نے افغانستان کے ہمسایہ ممالک پر زور دیتے ہوئے کہا کہ وہ اپنے ملکوں میں امریکی اور نیٹو افواج کی موجودوگی کو روکیں۔
روسی وزیر خارجہ کا کہنا تھا کہ امریکہ اس خطے کے دیگر ممالک کے ساتھ مختلف جوازاور معاہدوں کی آڑ میں فوجی اڈوں کے حصول کی کوشش کرتا رہے گا، لیکن ایشیائی ممالک کو چاہیے کہ امریکہ کو فوجی اڈے دینے سے انکار کریں، تاکہ افغانستان کو دہشت گردی سے بچا کر خطے میں استحکام کی کوششوں کو کامیاب کیا جا سکے۔
