راولپنڈی میں اے این ایف انٹیلیجنس نے بین الصوبائی منشیات اسمگلنگ گروہ کی دو خواتین ارکان دھرلی ہیں۔

تفصیلات کے مطابق اے این ایف انٹیلیجنس اور اے این ایف کوئٹہ نے مشترکہ کارروائی کرتے ہوئے بین الصوبائی منشیات اسمگلنگ گروہ کی دو خواتین ارکان گرفتار کرلی ہیں۔ترجمان اے این ایف نے کہا کہ دونوں عورتوں کو پشین کی تحصیل خانوزئی کے قریب مسافر بس سے گرفتار کیا گیا جبکہ ملزمان کے ذاتی قبضے اور سامان سے 39.600 کلوگرام چرس برآمد کرلی گئی ہے۔

ترجمان اے این ایف نے بتایا کہ ملزمان میں پشین کی رہائشی مہر مہوش اور رحیم یارخان کی رہائشی ریحانہ یاسمین شامل ہیں ، دونوں عورتیں پشین سے فیصل آباد منشیات اسمگل کر رہی تھیں۔ترجمان اے این ایف نے مزید بتایا کہ ملزمان کے خلاف انسداد منشیات ایکٹ کے تحت مقدمہ درج کر کے مزید تفتیش کا آغاز کر دیا گیا ہے۔