بھارتی حکومت نے پٹرولیم مصنوعات کی قیمتوں میں تاریخ میں پہلی بار ایک روز میں 80 پیسے تک کا اضافہ کیا ہے۔
بھارتی میڈیا کے مطابق بھارت میں پٹرول اور ڈیزل کی قیمتوں میں 80 پیسے کا اضافہ کیا گیا ہے یہ اضافہ 5 روز میں چوتھی بار کیا گیا ہے اس طرح گزشتہ پانچ روز میں قیمتوں میں مجموعی اضافہ 3 روپے 20 پیسے ہوگیا ہے۔
بھارت میں ہر ریاست میں پٹرول کی قیمتیں مختلف ہوتی ہیں اور اس وقت سب سے زیادہ ممبئی میں 112 روپے 51 پیسے جب کہ سب سے کم 97.81 روپے نئی دہلی میں ہے۔ بھارت اپنی ضرورت کا 80 فیصد پٹرول درآمد کرتا ہے۔
یاد رہے کہ بھارت میں ریاستی انتخابات کے دوران گزشتہ چار ماہ سے پٹرولیم مصنوعات کی قیمتوں میں یومیہ نظر ثانی کا عمل روک دیا گیا تھا، جسے اب بحال کردیا گیا ہے۔ بھارتی میڈیا کے مطابق 22 مارچ سے قیمتوں کی شرح پر کی گئی نظرثانی کے بعد سے اب تک 4 بار قیمتوں میں اضافہ کیا جاچکا ہے۔