وزیر خارجہ شاہ محمود قریشی سے یورپی یونین کی سفیر اندرولا کامینارا نے وزارت خارجہ میں ملاقات کی ہے۔
اسلام آباد – (اے پی پی): اتوار کے روز وزارت خارجہ کی جانب سے جاری بیان کے مطابق ملاقات کے دوران باہمی دلچسپی کے امور سمیت یورپی یونین کے ساتھ دو طرفہ تعاون پر بھی تبادلہ خیال کیا گیا۔
شاہ محمود قریشی نے کہا کہ پاکستان، یورپی یونین کے ساتھ دو طرفہ کثیرالجہتی تعلقات کو خصوصی اہمیت دیتا ہے، پاکستان، اقتصادی ترجیحات کے پیش نظر، یورپی یونین کے ساتھ اسٹریٹیجک شراکت داری کے اگلے مرحلے کے مشترکہ منصوبوں کو جلد عملی جامہ پہنانے کیلئے پر عزم ہے۔
وزیر خارجہ نے پاکستان اور یورپی یونین کے درمیان دو طرفہ تعلقات کے استحکام میں، پاکستان میں تعینات یورپی یونین کی سفیر اندرولا کامینارا کے کردار کی تعریف کی۔ یورپی یونین کی سفیر اندرولا کامینارا نے توصیفی کلمات پر وزیر خارجہ شاہ محمود قریشی کا شکریہ ادا کیا۔
