پاکستان ڈیموکریٹک موومنٹ کے سربراہ مولانا فضل الرحمن نے کہا ہے کہ ہم نے فیصلہ کرلیا توکسی کا باپ بھی ڈی چوک جانے سے نہیں روک سکتا۔
اسلام آباد میں جلسے سے خطاب کرتے ہوئے مولانا فضل الرحمان کا کہنا تھا کہ اگرہم نے فیصلہ کرلیا توکسی کا باپ بھی ہمیں ڈی چوک جانے سے نہیں روک سکتا، آج کے بعد اس کی نیند حرام ہوگی، نجات کے دن قریب آگئے ہیں، قوم جشن منائے گی۔
مولانا فضل الرحمان کا کہنا تھا کہ سنا ہے آج اس نے ایک اور ڈراما رچایا ہے،کوئی پرچی نکالی ہے کہ قتل کی دھمکیاں مل رہی ہیں، دماغ خراب ہےکسی کا جو تمہیں شہید کرائےگا، جھوٹی پرچیاں لکھتے ہو،اب تمہارے پاس یہی حربہ رہ گیا ہے، تمہارے خاتمےکا وقت آچکا ہے، پرچیاں ورچیاں تمہیں نہیں بچاسکتیں،خودکش حملے تو مجھ پر ہوئے ہیں، میرے ساتھیوں پر ہوئے ہیں، میرے ساتھی، استاد اور اکابر شہید ہوئے، تمہارا تو بال بھی بیکا نہیں ہوا۔
سربراہ پی ڈی ایم کا کہنا تھا کہ آج کامظاہرہ چند دنوں میں آزادی مارچ کا نتیجہ مہیا کردے گا، آج اسلام آباد میں ایک جلسی بھی منعقد ہوئی ہے، پتا نہیں کہاں سے اس کے غبارے میں ہوا بھری گئی، پانچ ،دس ہزار روپے میں لوگوں کو سرکاری وسائل سے جلسے میں لائے، یہ لوگ جلسے میں کرسیوں کو بھی نہیں بھر سکے۔
مولانا فضل الرحمان نے کہا کہ آپ کہتے ہیں کسی کو نہیں چھوڑوں گا، اپنی فکر کرو کہ تمہیں کون چھوڑےگا، تم این آر او کی بھیگ مانگ رہے ہو، لیکن ہم نہیں دے رہے، تم ہماری گرفت میں ہو، تمہیں نہیں چھوڑیں گے۔
