اسپیکر قومی اسمبلی اسد قیصر نے فیصلہ کیا ہے کہ قومی اسمبلی کا اجلاس ہفتے اور اتوار کے روز بھی جاری رہے گا۔

تفصیلات کے مطابق اسپیکر قومی اسمبلی کی زیر صدارت اجلاس منعقد ہوا، جس میں مشیر  برائے پارلیمانی امور بابر اعوان نے  بھی شرکت کی، اجلاس میں تحریک عدم اعتماد اور قومی اسمبلی کے اجلاس سے متعلق تفصیلی مشاورت کی گئی۔

ذرائع کے مطابق اجلاس کے شرکاء نے قومی اسمبلی کا اجلاس ہفتے اور اتوار کے روز بھی  جاری رکھنے کا فیصلہ کیا، جس میں تحریک عدم اعتماد پر بحث کی جائے گی۔ذرائع کا کہنا ہےکہ قومی اسمبلی کا حالیہ اجلاس 3 اپریل تک جاری رکھا جائےگا۔

یاد رہے کہ 25 مارچ کو ڈپٹی اسپیکر قومی اسمبلی قاسم سوری کی زیر صدارت ہونے والے اجلاس کو وزیراعظم عمران خان کیخلاف تحریک عدم اعتماد پیش کرنے کے بعد 31 مارچ 2022ء جمعرات تک ملتوی کر دیا گیا تھا۔