وزیر اعظم عمران خان نے  دھمکی آمیز خط سینئر صحافیوں کیساتھ شئیر کرنے کا اعلان کر دیا، اتحادی جماعتوں کو بھی خط دکھائیں گے۔

تفصیلات کے مطابق تقریب سے خطاب میں وزیراعظم عمران خان کا کہناتھا کہ تحریک عدم اعتماد ایک جائز جمہوری حق ہے،لیکن یہ تحریک عدم اعتماد ایک غیر ملکی سارش ہے، یہ ان لوگوں کی سازش ہے کہ جو نہیں چاہتے کہ پاکستان کی خود مختار پالیسی ہو۔ عمران خان کا کہنا تھا کہ خط کے حوالے سے بہت باتیں ہو رہی ہیں، آج میں یہ خط سینئر صحافیوں کو دکھاؤں گا۔ ایک ایک اتحادی کو دکھاوں گا کہ یہ سچ ہے۔

اسلام آباد میں ای پاسپورٹ کے اجراء کی  تقریب سے خطاب کرتے ہوئےوزیراعظم عمران خان نے کہا ہے  کہ ای پاسپورٹ سے ٹورزم  کو بھی فائدہ ہوگا،  ٹیکنالوجی کا استعمال جتنا بڑھے گا، کرپشن اتنی ہی کم ہوگی، ٹیکنالوجی کی وجہ  سے اپوزیشن کی کرپشن کرنے کی صلاحیت ختم ہوگئی۔ انہوں نے مزید کہا کہ پاکستان کی برآمدات اور درآمدات میں خلیج کم کرنے میں ٹورزم اہم کردار ادا کرے گی، اوورسیز پاکستانیوں نے 31 ارب ڈالر کی ترسیلات زر بھیجی ہیں۔