پنجاب میں حکومت سازی کے معاملے پر پاکستان تحریکِ انصاف (پی ٹی آئی) کے ناراض دھڑوں کے درمیان باہمی رابطے ہوئے ہیں۔
ذرائع کا بتانا ہے کہ علیم خان گروپ، ترین گروپ اور چھینہ گروپ کے رہنماؤں کے آپس میں رابطے ہوئے ہیں جس میں تینوں دھڑوں کے سینئر رہنماؤں نے غیر رسمی مشاورت کی ہے۔ذرائع کے مطابق مشاورتی اجلاس میں اس بات پر بحث کی گئی ہے کہ پنجاب میں کس کا ساتھ دینا ہے ؟ اس کا فیصلہ کیا جائے۔
ذرائع کا کہنا ہے کہ ن اور ق لیگ بھی ان تینوں گروپوں سے مسلسل رابطے میں ہے اور اسی سلسلے میں تینوں گروپس کی مشترکہ لائحہ عمل کے لئے غیر رسمی مشاورت ہوئی۔اس کے علاوہ تینوں گروپس کے علیحدہ اپنے اپنے مشاورتی اجلاس بھی آج ہوں گے جس میں پنجاب میں وزیر اعلیٰ کیلئے مشترکہ فیصلے پر ایک دوسرے کو قائل کرنے کی کوشش کی جائے گی۔
ذرائع کے مطابق تمام گروپس کے درمیان آپس میں مزید مشاورت جاری رکھنے پر اتفاق بھی ہوا ہے۔ذرائع نے مزید بتایا ہے کہ رابطے کے دوران تینوں دھڑوں نے وزیرِ اعلیٰ پنجاب کے لیے مشترکہ فیصلہ کرنے پر ایک دوسرے کو قائل کرنے کی کوشش بھی کی۔
یاد رہے کہ پنجاب میں وزیراعلیٰ کی تبدیلی کے معاملے پر پاکستان تحریک انصاف کے تین گروپ علیم خان، جہانگیر ترین اور چھینہ گروپ سامنے آئے ہیں۔
