پاکستان تحریک انصاف کی مرکزی قیادت نے آئندہ انتخابات میں ٹکٹوں کی تقسیم کے متعلق بڑا فیصلہ کیا ہے۔

تفصیلات کے مطابق آج وزیراعظم عمران خان کی زیر صدارت پارٹی قیادت کا اجلاس منعقد ہوا، جس میں اہم فیصلے کئے گئے۔ اجلاس میں فیصلہ کیا گیا کہ آئندہ عام انتخابات میں تحریک انصاف 135 سے زائد حلقوں میں اپنے امیدوار تبدیل نہیں کرے گی، علاوہ ازیں منحرف اراکین اسمبلی کے حلقوں میں متبادل امیدواروں کیلئے بھی مشاورت شروع کردی گئی ہے۔

ذرائع کے مطابق اجلاس میں فیصلہ کیا گیا ہے کہ تحریک عدم اعتماد میں ساتھ دینے والے اراکین کو ترجیحی طور پر ٹکٹس دئیے جائیں گے، اور ملک بھر سے تمام حلقوں میں امیدوار نامزد کئے جائیں گے۔

ذرائع کا کہنا ہے کہ اجلاس میں آئندہ عام انتخابات میں انتخابی اتحاد سے متعلق بھی تبادلہ خیال کیا گیا، تاہم بعض ممبران نے انتخابات میں کسی سے بھی اتحاد نہ کرنے کا مشورہ دیا، اور انتخابی اتحاد سے متعلق فیصلے پر مزید مشاورت اور تمام انتخابی حلقوں میں پی ٹی آئی کے امیدوار نامزد کرنے پر بھی اتفاق کیا گیا۔

یاد رہے کہ دو روز قبل وزیراعظم عمران خان کا کہنا تھا کہ آئندہ انتخابات میں پارٹی اور نظرئیے کیساتھ مخلص افراد کو ہی ٹکٹس دئیے جائیں گے، کسی ضمیر فروش کو ٹکٹ نہیں دیا جائے گا۔