ایرانی افواج کی خلیج فارس میں جاری مشقوں کے دوران امریکی ڈرون طیاروں نےطے شدہ روٹ بل کر ایران کی سرحد کے قریب پروازیں کی ہیں جس پر تہران نے امریکہ کو وارننگ جاری کر دی ہے۔
ایران کی خبر رساں ایجنسی آئی آر آئی بی کی رپورٹ مطابق ایرانی افواج اپنے معمول کی سالانہ جنگی مشقوں میں مصروف تھی کہ منگل کے روز امریکی ڈرون طیارے RQ-4 اور MQ-9 نے اپنا طے شدہ روٹ بدل کر ایرانی سرحد کی جانب پروازیں کیں، اس موقع پر ایران کی فضائی افواج نے امریکی طیاروں کی غیر معمولی نقل و حرکت نوٹ کرتے ہوئے انہیں ائیر ڈیفنس سسٹم کے ذریعے وارننگ جاری کی۔ ایرانی حکام کا کہنا ہے کہ امریکی طیارے ہماری وارننگ کے بعد اپنے روٹ میں واپس جاتے ہوئے ایران کی سرحد سے دور نکل گئے۔
Iran says it warned off U.S. drones near its Gulf drills https://t.co/0wQ5U5SY5Q pic.twitter.com/tUeEHMpSx9
— Reuters (@Reuters) November 9, 2021
ایرانی افواج کی یہ جنگی مشقیں آبنائے ہرمز کے مشرق سے بحر ہند کے شمال اور بحیرہ احمر کے طویل علاقے تک پھیلی ہوئی تھیں، برطانوی نیوز ایجنسی روئٹرز کے مطابق تیل کی عالمی تجارت کا کم از کم پانچواں حصہ خلیج فارس اور آبنائے ہرمز کی آبی گزرگاہوں سے گزرتا ہے۔
یاد رہے کہ 2018ء میں امریکی صدر ڈونلڈ ٹرمپ کی جانب سے ایران کے ساتھ جوہری معاہدے سے یکطرفہ طور پر علیحدگی کے بعد خلیج فارس میں امریکہ اور ایران کے مابین کشیدگی حائل ہے، یہاں دونوں ممالک کی بحری اور فضائی افواج کے بھی آپس میں تنازعے ہوتے رہتے ہیں۔
واضح رہے کہ ایران نے عالمی طاقتوں کے ساتھ 29 نومبر 2021ء سے جوہری معاہدے کی بحالی کیلئے مذاکرات کا دوبارہ آغاز کرنے پر رضامندی ظاہر کی ہے، لیکن اس سے قبل دونوں ممالک کے تعلقات پھر سے کشیدہ ہو رہے ہیں۔
