مسلم لیگ (ن) نے وزیر اعلیٰ پنجاب کے انتخاب کیلئے پٹیشن تیار کرلی، حمزہ شہباز کل لاہور ہائیکورٹ میں آئینی درخواست دائر کریں گے۔

تفصیلات کے مطابق ن لیگ کی جانب سے تیار کی گئی درخواست میں اسپیکر، ڈپٹی اسپیکر اور دیگر کو فریق بنایا گیا ہے۔ درخواست میں  کہا گیا ہے کہ یکم اپریل سے وزیراعلیٰ پنجاب کا عہدہ خالی ہے، پنجاب اسمبلی کا اجلاس طلب کر کے فوری طور پر وزیراعلیٰ کے انتخابات کرائے جائیں۔ علاوہ ازیں درخواست میں ہی استدعا کی گئی ہے کہ پنجاب اسمبلی کے احاطے کو سیل کرنے کے اقدام کو بھی غیر قانونی قرار دیا جائے۔

ن لیگ کے رہنما عطا تارڑ نے کہا ہےکہ عدالت سے استدعا ہے کہ اس معاملے کو صبح کی سماعت کیلئے مقرر کیا جائے، اور وزیراعلیٰ کا انتخاب قانون کے مطابق فوری کروایا جائے، آئین میں درج ہے کہ جیسے ہی وزیراعلیٰ کی نشست خالی ہو فوری الیکشن کروائے جائیں، لیکن حکومت نے جب دیکھا کہ نمبرز پورے نہیں تو اجلاس ملتوی کردیا گیا۔

یاد رہے کہ پنجاب اسمبلی کا اجلاس اسمبلی میں توڑ پھوڑ کے باعث 16 اپریل تک ملتوی کر دیا گیا ہے۔