قائد حزب اختلاف شہبازشریف نے کہا ہے کہ مہنگائی، بھوک، افلاس، نفرت پھیلانے والے عوام میں شوق سے جائیں، آپ آرٹی ایس سے اقتدار میں آئے تھے، عوام نے آپ کو مسترد کیا تھا۔
اپنے بیان میں شہبازشریف نے کہا کہ اقتدار سے چمٹا شخص خوددار نہیں، خود غرض ہے، اقتدار کے غم میں عمران نیازی پارلیمنٹ، آئین اور عدلیہ پر حملے کر رہا ہے۔
شہباز شریف کا کہنا تھا کہ عمران نیازی نے کل عدم اعتماد کی کامیابی کا آج ہی پیشگی اعلان کردیا، وہ خط کے معاملے پر جھوٹے ثابت ہوچکے ہیں، عوام کو بھیڑ بکریاں نہ سمجھیں، عمران نیازی جھوٹ نہ بولیں، خط عوام کو دکھائیں۔
انہوں نے کہا کہ سپریم کورٹ نے تمام شواہد دیکھنے کے بعد ڈپٹی اسپیکر کی رولنگ کو کالعدم قرار دیا، پارلیمنٹ، عدالت، حکومت، سیاست میں ہارنے کے بعدذہنی توازن کھو بیٹھے ہیں، اتحادی اور عوام آپ کی نالائقی، نااہلی اور کرپشن کا بوجھ مزید اٹھانے کو تیارنہیں، آئین کے مطابق عدم اعتماد کا مقابلہ کریں۔
شہباز شریف کا کہنا تھا کہ عمران نیازی کے جھوٹ کا جواب کل اسمبلی میں ووٹ کی شکل میں دیں گے، اور آئین، پارلیمنٹ اور عوام کو کسی کی ضد، تکبر، دھونس کا یرغمال نہیں بننے دیں گے۔
