صدر مملکت ڈاکٹر عارف علوی نے کہا ہے کہ فاٹا کو ملک کے دیگر علاقوں کے برابر لانے کیلئے اس کی ترقی پر توجہ دینے کیلئے اقدامات کئے جا رہے ہیں۔
اسلام آباد – (اے پی پی): ملک میں تجارتی اور کاروباری سرگرمیوں کو بڑھانے کے لیے نئے ضم ہونے والے اضلاع کی تاجر برادری کو سہولت فراہم کرنے اور کاروبار اور سرمایہ کاری کا سازگار ماحول فراہم کرنے کی ضرورت ہے۔ انہوں نے کہا کہ محدود وسائل اور عالمی مالیاتی بحران کے باوجود پاکستان نے کووڈ۔ 19 کی وبا کے دوران کاروباری برادری اور معاشرے کے کمزور طبقات کو زیادہ سے زیادہ ریلیف فراہم کیا۔
صدر مملکت نے ان خیالات کا اظہار باجوڑ چیمبر آف کامرس اینڈ انڈسٹری (بی سی سی آئی) کے وفد سے گفتگو کرتے ہوئے کیا جس نے پیر کو یہاں ایوان صدر میں ان سے ملاقات کی۔ وفد میں باجوڑ چیمبر آف کامرس اینڈ انڈسٹری کے صدر لالی شاہ، نائب صدر معراج الدین خان ایگزیکٹو ممبران شامل تھے۔
President Dr. Arif Alvi meeting with a delegation of Bajaur Chamber of Commerce and Industry, at Aiwan-e-Sadr. pic.twitter.com/cfhyCWeLgt
— The President of Pakistan (@PresOfPakistan) April 11, 2022
وفد نے صدر کو ضلع باجوڑ کی تاجر برادری کو درپیش مسائل سے آگاہ کیا۔ اس موقع پر بتایا گیا کہ باجوڑ کی تاجر برادری کو کمرشل بینکوں سے قرضے حاصل کرنے میں مشکلات کا سامنا ہے۔ انہوں نے پڑوسی ممالک کے ساتھ دوطرفہ تجارت کو بڑھانے کے لیے افغانستان کے ساتھ تجارتی پوائنٹس کھولنے کی ضرورت پر بھی روشنی ڈالی۔
اجلاس سے خطاب کرتے ہوئے صدر مملکت نے کہا کہ تاجر برادری کو حکومت کی جانب سے پیش کیے جانے والے قرضوں سے استفادہ کرنے کی ضرورت ہے۔ نوجوان کاروباری افراد اپنے کاروبار شروع کرنے کے لیے آسان شرائط و ضوابط پر کاروباری قرضے حاصل کر سکتے ہیں۔انہوں نے تاجروں کو جدید کاروباری طریقوں کو اپنانے کی بھی ترغیب دی جو ملک کی سماجی و اقتصادی ترقی میں اپنا حصہ ڈالنے کے ساتھ ساتھ ان کے کاروبار کی رسائی کو بڑھانے میں معاون ثابت ہوں گے۔
صدر نے تاجر برادری سے یہ بھی کہا کہ وہ باجوڑ کے نوجوانوں کو آئی ٹی اور ٹیلی کمیونیکیشن کی وزارت کی طرف سے شروع کیے گئے آن لائن سکل ڈویلپمنٹ کے ڈیجی سکلز پروگرام سے استفادہ کرنے کی ترغیب دینے میں مدد کریں۔ صدر مملکت نے وفد کو ان کے مسائل کے حل کے لیے متعلقہ محکموں تک پہنچانے کی یقین دہانی بھی کرائی۔
