سابق وزیراعظم عمران خان نے کہا ہے کہ حکومت جانے کا دکھ نہیں، لیکن اپنے ہی بندوں سے دھوکہ کھانے کا بہت دکھ ہوا۔

تفصیلات کے مطابق آج پی ٹی آئی کی سیاسی کمیٹی کا اجلاس اسلام آبادمیں ہوا، جس میں ملکی سیاسی صورتحال پر گفتگو ہوئی اور عوامی رابطہ مہم اور ملک گیرجلسے کرنے کا فیصلہ کیا گیا۔

اجلاس میں چیئرمین پاکستان تحریک انصاف عمران خان نے کہا کہ اسمبلی سے استعفے دے دئیے، اب پارلیمنٹ نہیں جائیں گے۔

انہوں نے کہا کہ تحریک انصاف اب عوامی سطح پر نئے انتخابات کیلئے دباؤ ڈالے گی، تحریک انصاف کی مقبولیت سے تمام جماعتیں خوفزدہ ہیں، آئندہ انتخابات میں دوبارہ دو تہائی اکثریت لے کر آئیں گے۔ پی ٹی آئی چیئرمین کا کہنا تھا کہ اتحادیوں کیساتھ مل کر بنائی گئی حکومت میں بلیک میل ہوتے رہے، آئندہ اتحادیوں کو ساتھ ملا کر حکومت نہیں بنائیں گے، بیساکھیوں کے سہارے حکومت ملی، کھل کر کام کرنے کا موقع نہیں ملا۔

انہوں نے کہا کہ اب پارٹی سے وفاداروں کو ہی ٹکٹ دے کر کامیاب بنائیں گے، دوبارہ اقتدار میں آ کر ہارس ٹریڈنگ کا ہمیشہ کیلئے راستہ بند کروں گا۔ عمران خان نے کہا کہ حکومت  جانے کا دکھ نہیں، لیکن اپنے ہی افراد کے دھوکہ دینے سے بہت دکھ ہوا۔