وزیراعظم شہبازشریف نے کہا ہے کہ اداروں کیخلاف مہم چلانے والے قانون کی گرفت میں ضرور آئیں گے۔

آج میڈیا سے گفتگو کرتے ہوئے وزیراعظم شہبازشریف نے کہا کہ سیاسی سرگرمیوں کی ہر کسی کو اجازت ہے مگر انتشار پھیلانے کی اجازت کسی کو نہیں دیں گے، اداروں کے خلاف مہم چلانے والے قانون کی گرفت میں آئیں گے۔

انہوں نے کہا کہ مسلم لیگ (ن) کی سوچ رہی ہے کہ انتخابی اصلاحات کے ساتھ الیکشن میں جائیں، ہمارے لئے سب سے بڑا چیلنج تباہ حال معیشت کی بحالی اور مہنگائی پر قابو پانا ہے کیونکہ پی ٹی آئی خزانہ خالی چھوڑ کر گئی ہے، مہنگائی کم کرنے کیلئے مختصر مدتی اور میڈیم ٹرم پلان تشکیل دے رہے ہیں۔

شہباز شریف کا کہنا تھا کہ آئین شکنوں کے خلاف سپریم کورٹ کے حکم پر من و عن عمل کریں گے، اداروں کیخلاف مہم پر قانون اپنا راستہ خود بنائے گا، ہم کسی کو کچھ نہیں کہیں گے،ادارے اپنا کام کریں گے، اداروں کے خلاف مہم چلانے والے قانون کی گرفت میں آئیں گے۔

یاد رہے کہ 79 ویں  آرمی فارمیشن کمانڈر کانفرنس میں بھی فوج کا بدنام کرنے کی مہم کا نوٹس لیا گیا ہے۔