وزیراعظم شہبازشریف نے ملک کو درپیش سنگین معاشی چیلنجز سے نمٹنے کیلئے ممتاز اور غیر جانبدار معاشی ماہرین پر مشتمل اقتصادی کونسل تشکیل دینے کا فیصلہ کیا ہے۔
تفصیلات کے مطابق وزیراعظم شہباز شریف کی زیر صدارت معاشی ماہرین کا اجلاس ہوا جس میں ملک کو درپیش موجودہ سنگین معاشی صورتحال پر تفصیلی غور کیا گیا، جس میں سیکریٹری خزانہ کی جانب سے ملکی معاشی صورتحال، ریونیوز، بجٹ خساروں، داخلی اور بیرونی قرض کی صورتحال سمیت مجموعی قومی بیلنس شیٹ سے متعلق تفصیلی بریفنگ دی گئی۔
Prime Minister Shehbaz Sharif has called an urgent meeting with leading economists to discuss in detail the current dire economic situation facing the country. pic.twitter.com/OACJwjY9Vn
— Prime Minister of Pakistan (@PMO_PK) April 12, 2022
وزیراعظم آفس کی جانب سے جاری اعلامیے کے مطابق وزیراعظم شہبازشریف نے اجلاس میں معاشی ماہرین کو ہنگامی بنیادوں پر سفارشات کی تیاری کا حکم دے دیا، وزیراعظم نے ملک کو درپیش سنگین صورتحال اور معاشی چیلنجز سے نکلنے کے لیے ہدایات جاری کیں۔ تجاویز زراعت، صنعت، سرمایہ کاری، بینکاری، تاجر و کاروباری برادری سمیت تمام متعلقہ طبقات کی آراء کی روشنی میں مرتب کی جائیں گی جس کے حصول کے لیے آئندہ چند دنوں میں سمٹ منعقد کرنے کا فیصلہ کیا گیا ہے۔
وزیراعظم شہبازشریف نے ہدایت کی کہ معاشی صورتحال اور سنگین مالی خطرات کو دیکھتے ہوئے فوری، وسط اور طویل المدتی اہداف کا واضح تعین کریں، پالیسی آپشنز پر جامع سفارشات پیش کریں تاکہ ان کی روشنی میں ٹھوس اقدامات لیے جا سکیں۔
