وزیراعظم شہباز شریف نے ‏جنوبی وزیرستان کے علاقے انگور اڈہ میں دہشت گردوں کے حملے کی شدید مذمت کی ہے اور دہشت گردوں سے لڑتے ہوئے اور مادر وطن کے دفاع میں شہید ہونے والے قوم کے بیٹوں کو خراج عقیدت پیش کیا ہے۔

اسلام آباد – (اے پی پی): منگل کو اپنے بیان میں وزیراعظم شہباز شریف نے کہا کہ میجر شجاعت حسین اور سپاہی عمران خان کو ان کی عظیم قربانی پر قوم سلام پیش کرتی ہے ۔ انہوں نے کہا کہ ہمارے شہداء کی قربانیاں دہشت گردی کے خلاف پاکستان کے پختہ عزم کا بین ثبوت ہے۔

انہوں نے کہا کہ دہشت گردی کے خلاف جنگ میں پوری قوم اپنی مسلح افواج اور قانون نافذ کرنے والے اداروں کے شانہ بشانہ ہے، اُنہوں نے دعا کی کہ اللہ تعالی شہداء کے درجات بلند فرمائے اور اہل خانہ کو صبر جمیل دے۔

یاد رہے کہ گزشتہ روز جنوبی وزیرستان میں دہشت گردوں کے حملے کے بعد فائرنگ کے تبادلے میں ایک میجر سمیت پاک فوج کے دوجوان شہید ہو گئے تھے۔