الیکشن کمیشن آف پاکستان نے پنجاب میں بلدیاتی انتخابات کے پہلے مرحلے کا شیڈول جاری کر دیا ہے۔

الیکشن کمیشن کے جاری کردہ شیڈول کے مطابق پنجاب میں بلدیاتی انتخابات کے پہلے مرحلے کیلئے  کاغذات نامزدگی 21 اپریل سے 25 اپریل تک جمع کرائے جا سکیں گے، کاغذات نامزدگی کی جانچ  پڑتال 27 اپریل سے 9 مئی تک ہوگی۔

کاغذات نامزدگی منظور یا مسترد ہونے کے خلاف اپیلیں 10 سے 12 مئی تک دائر کی جائیں گی، اپیلیں 14 مئی تک نمٹائی جائیں گی۔

الیکشن کمیشن کے مطابق کاغذات نامزدگی 19 مئی تک واپس لئے جا سکیں گے، انتخابی نشان 20 مئی کو الاٹ کئے جائیں گے۔

پنجاب میں پہلے مرحلے میں بلدیاتی انتخابات 9 جون کو ہوں گے۔

پہلے مرحلے میں ڈی جی خان ، راجن پور، مظفر گڑھ، لیہ، خانیوال، ویہاڑی، بہاولپور، ساہیوال،  ٹوبہ ٹیک سنگھ، چنیوٹ، سیالکوٹ، خوشاب، سیالکوٹ، حافظ آباد، منڈی بہاؤلدین، جہلم اور اٹک میں انتخابات ہوں گے۔