وزیراعظم آزاد کشمیر سردار عبدالقیوم نیازی نے کہا ہے کہ کہ پارٹی ممبران کی جانب سے عدم اعتماد کی تحریک استعفے کی وجہ ہے، مجھ پر چارج شیٹ میں الزام تک نہ ملا، چلتی حکومت کے خلاف عدم اعتماد کیوں لائی گئی؟

اپنے عہدے سے استعفے کے بعد پہلی  پریس کانفرنس میں انہوں نے اس بات کی تصدیق کی کہ انہوں نے وزیراعظم آزاد کشمیر کےعہدے سے استعفیٰ دے دیا ہے۔ سردار عبدالقیوم نیازی نے کہا کہ مجھے معلوم ہوا کہ راتوں رات پیسہ تقسیم ہواہے، مجھے چارج شیٹ دی گئی کہ میں نے اپنی پارلیمانی پارٹی کا اعتماد کھو دیا۔

انہوں نے کہاکہ عمران خان کی کرپشن اور احتساب کے خلاف جنگ رہی ہے، انتخابات سے دو سال قبل تحریک انصاف میں شامل ہوا تھا، انتخابات کے بعد مجھے جماعت کی قیادت نے ہی وزیراعظم بنایا، وزیراعظم آزاد کشمیر بنانے پر عمران خان کا شکر گزار ہوں۔

انہوں نے کہا کہ میں نے آزاد کشمیر میں کم عرصے میں بہت ترقیاتی منصوبوں پر کام کئے، پہلے وزیروں کو فارغ کیا اور پھر اپنا رستہ لیا، جمہوری آدمی ہوں اور عمران خان کا ساتھی ہوں، میں نے اپنا جمہوری فیصلہ لیااور باوقار طریقے سے استعفیٰ دے دیا، پہلے استعفیٰ پارٹی چیئرمین کو بھیجا اور پھر صدر کو بھجوایا۔