وزیر اعظم شہباز شریف سے بلوچستان نیشنل پارٹی کے سربراہ اختر مینگل اور بلوچستان عوامی پارٹی کے پارلیمانی لیڈر خالد مگسی نے ملاقات کی ہے۔

اسلام آباد – (اے پی پی): وزیراعظم آفس میڈیا ونگ کی جانب سے اتوار کو جاری بیان کے مطابق اس موقع پر انہوں نے وزیر اعظم شہباز شریف کو وزارت عظمیٰ کا منصب سنبھالنے پر مبارکباد پیش کی اور ملک کی سماجی و اقتصادی ترقی کے لیے وفاقی حکومت کے ساتھ مل کر کام کرنے کے عزم کا اظہارکیا۔

علاوہ ازیں ملاقات میں کابینہ کی تشکیل سمیت دیگر سیاسی امور پر بھی تبادلہ خیال کیا گیا۔

ملاقات کے دوران وزیراعظم شہباز شریف نے ملک میں جمہوریت کے استحکام اور عوامی فلاح و بہبود کے لیے متحد ہو کر کام کرنے کے عزم پر اختر مینگل، خالد مگسی اور ان کے رفقا کا شکریہ ادا کیا۔ اس موقع پر مسلم لیگ (ن)کے اراکین قومی اسمبلی خواجہ سعد رفیق، سردار ایاز صادق اور رانا ثنااللہ بھی موجود تھے۔