پاکستان تحریک انصاف کے چیئرمین عمران خان کی گزشتہ روز کراچی جلسے میں تقریر پر پیپلز پارٹی کے سیکرٹری جنرل نیئر بخاری کا بیان سامنے آیا ہے۔
پاکستان پیپلزپارٹی کے سیکرٹری جنرل نیئربخاری نے کہا ہے کہ عمران خان نے امریکہ کے خلاف نہیں ہوں کا بیان دے کر ایک اور یوٹرن لیا، وہ وقت دور نہیں جب عمران خان مبینہ خط کے معاملے پربھی یوٹرن لیں گے۔
اپنے بیان میں نیئر بخاری کا کہنا تھا کہ این آر او نہیں دوں گا کہنے والے عمران خان اب ہر جلسے میں این آر او مانگنے پر مجبور ہیں، عمران خان خود کو فارن فنڈنگ کیس میں نا اہل ہوتا دیکھ رہے ہیں۔
انہوں نے کہا کہ عمران خان الیکشن کمیشن کو بھی متنازع بنانےکی کوشش کر رہے ہیں، پی ٹی آئی نے اپنے دور حکومت میں فارن فنڈنگ معاملے پر الیکشن کمیشن پر مسلسل دباؤ ڈالا۔ فارن فنڈنگ تحریک انصاف کے خلاف مضبوط کیس اور بہت بڑا اسکینڈل ہے، پیپلزپارٹی آزاد اور خودمختار ادارے الیکشن کمیشن کے ساتھ کھڑی ہے۔
یاد رہے کہ گزشتہ روز کراچی میں جلسے سے خطاب کرتے ہوئے عمران خان کا کہنا تھا کہ فارن فنڈنگ کیس میں پی ٹی آئی کو میچ سے باہر کرنے کی کوشش کی جا رہی ہے، لیکن میں واضح کر دوں کہ ایسا کی ا تو ملک کا نقصان ہو گا۔
