پاکستان مسلم لیگ (ق) نے وزیر اعلیٰ پنجاب کے الیکشن کو چیلنج کرنے کا فیصلہ کیا ہے۔
چوہدری پرویز الہٰی کی زیر صدارت ق لیگ اور پی ٹی آئی کی پارلیمانی پارٹی کا اجلاس ہوا، جس سے خطاب کرتے ہوئے پرویز الہٰی نے کہا کہ کل ایک بوگس، غیر آئینی اور متنازع الیکشن کروایا گیا۔
اسپیکر پنجاب اسمبلی نے کہا کہ وزیر اعلیٰ کے الیکشن کو گورنر اور ایڈووکیٹ جنرل پنجاب متنازع قرار دے چکے، یہ آئینی مسئلہ ہے جب تک واضح صورت حال سامنے نہیں آتی الیکشن کو تسلیم نہیں کرسکتے۔
پرویز الہٰی نے کہا کہ ماضی میں عدالتوں پر حملہ کیا اب پنجاب اسمبلی پر دھاوا بول دیا گیا، کل جو کچھ ہوا پنجاب کی پارلیمانی تاریخ میں کبھی پہلے نہیں ہوا، پولیس ایسے آئی جیسے ڈاکوؤں پر حملہ کرنے آئے ہیں۔
انہوں نے کہا کہ یہ سب کچھ حمزہ شہباز کی سربراہی میں ہوا، ان کا ٹارگٹ تھا، پی ٹی آئی اور ہمارے ارکان کو ایوان سے باہر نکالا جائے۔
پرویز الہٰی نے کہا کہ ڈپٹی اسپیکر نے گیلری میں الیکشن کروایا جس کی کوئی آئینی حیثیت نہیں، مہمانوں کی گیلری میں میگا فون پکڑ کر تو کوئی بھی الیکشن کرواسکتا ہے۔
اسپیکر پنجاب اسمبلی نے کہا کہ جس طرح جعلی الیکشن کروایا اسی طرح کوئی جعلی گورنر ڈھونڈ کر جعلی حلف بھی لے لیں، ہم نے آئینی ماہرین کا اجلاس طلب کر لیا ہے، اس غیر آئینی الیکشن کو چیلنج کرنے کے لیے لائحہ عمل طے کیا جائے گا۔ پرویز الہٰی نے کہا کہ ہم نے جو درخواست دی ابھی تک اس پر مقدمہ درج نہیں کیا گیا۔
یاد رہے کہ آج گورنر پنجاب کو وزیر اعظم کی جانب سے ہٹا دیا گیا تھا ،جبکہ انہوں نے پریس کانفرنس میں کہا کہ جب تک صدر مجھے نہیں ہٹا تے میں اپنے منصب نہیں ہٹوں گا ۔
