وفاقی وزیر داخلہ رانا ثناءاللہ نے کہا ہے  کہ وزیراعظم شہباز شریف کی خصوصی ہدایت پر سابق وزیراعظم عمران خان کو فول پروف سیکیورٹی فراہم کر دی گئی ہے۔

گزشتہ روز ایوان صدر میں وفاقی کابینہ کی تقریب حلف برداری کے دوران صحافیوں سے غیر رسمی گفتگو کرتے ہوئے وفاقی وزیر داخلہ رانا ثناءاللہ نے کہا کہ زیراعظم شہباز شریف کی ہدایت پر سابق وزیر اعظم عمران خان کو فول پروف سیکیورٹی فراہم کردی گئی ہے۔ انہوں نے کہا کہ عمران خان کی زندگی کو خطرے کے حوالے سے ہمارے پاس کوئی انٹیلی جنس اطلاعات نہیں ہیں۔

علاوہ ازیں اپنے ایک اور بیان میں رانا ثناءاللہ کا کہنا تھا کہ اب  سینٹرل جیل کے حاضری رجسٹر کا صفحہ پلٹ چکا ہے،مجرم چار سال ملک پر مسلط اور بے گناہ جیلوں میں رہے۔

انہوں نے کہا کہ اللہ تعالیٰ نے اپنی قدرت کا یہ نظارہ عوام کو دکھایا ہے ،دوسروں کو رسوا کرنے کی کوشش کرنے والے خود خوار ہوگئے ہیں، اب آئین شکن اور گھڑی چور جیلوں میں جائیں گے۔

یاد رہے کہ گزشتہ ماہ پی ٹی آئی رہنماء فیصل واوڈا نے نجی چینل سے گفتگو کرتے ہوئے کہا تھا کہ عمران خان کی جان کو خطرہ ہے، انہیں قتل کرنے کی سازش کی جا رہی ہے۔