الیکشن کمیشن آف پاکستان نے پی ٹی آئی فارن فنڈنگ کیس  پر سماعت ایک ہفتے کیلئے ملتوی کردی۔

تفصیلات کے مطابق چیف الیکشن کمشنر کی سربراہی میں 3 رکنی کمیشن نے پی ٹی آئی کی فارن فنڈنگ کیس پر سماعت کی۔ دوران سماعت  الیکشن کمیشن کے سامنے اسلام آباد ہائیکورٹ کا فیصلہ پڑھ کر سنایا گیا۔

کمیشن کو اکبر ایس بابر کے معاون وکیل نے بتایا کہ اسلام آباد ہائیکورٹ نے اکبر ایس بابر کو کیس سے الگ کرنے کی درخواست خارج کر دی ہے، جبکہ پی ٹی آئی کے وکیل انور منصور نے الیکشن کمیشن کے اراکین نامکمل ہونے کا نکتہ اٹھا یا۔

دوران سماعت پاکستان تحریک انصاف کے وکیل انور منصورنے کہا کہ اسلام آباد ہائیکورٹ نے جو آبزرویشن دی، وہ بدقسمتی ہے، انہوں نے کہا کہ جن باتوں پر دلائل نہیں دئیے گئے تھے وہ بھی حکمنامہ میں شامل کر دی گئیں۔

انور منصور کا کہنا تھا  کہ میں اپنا ایک اعتراض کمیشن کے سامنے رکھنا چاہتا ہوں، الیکشن کمیشن اس وقت مکمل نہیں ہے، الیکشن کمیشن کے دو ارکان ابھی تک تعینات نہیں ہوسکے۔

اس موقع پر اکبر ایس بابر کے وکیل نے کہا کہ پی ٹی آئی کی جانب سے  یہ اعتراض پہلے بھی اٹھایا گیا تھا، جو خارج کردیا گیا تھا۔

پی ٹی آئی کے وکیل انور منصور نے کہا کہ  آئین میں الیکشن کمیشن کے ممبران کی تعداد متعین ہے، قانون کے مطابق اگر بینچ میں اختلاف  ہو تو معاملہ کمیشن میں پیش ہوگا۔ انہوں نے کہا کہ الیکشن ایکٹ 2017ء کے مطابق کمیشن کے تمام ارکان کا ہونا لازمی ہے۔

اس موقع پر چیف الیکشن کمشنر نے کہا کہ اسلام آباد ہائیکورٹ نے ہمیں 30 دن کے اندر فیصلہ کرنے کی ہدایات جاری کی ہیں، ہم  اس کا کیا کریں گے؟

بعد ازاں  کیس کی سماعت ایک ہفتہ کیلئے ملتوی کردی گئی۔