وفاقی وزیر اطلاعات و نشریات مریم اورنگزیب نے کہا ہے کہ وزیراعظم ہاؤس کے علاوہ کسی اور جگہ کو کیمپ آفس ڈکلیئر نہیں کیا گیا، بے بنیاد اور من گھڑت خبریں نہ پھیلائی جائیں۔
اپنے بیان میں وزیر اطلاعات و نشریات مریم اورنگزیب کا کہنا تھا کہ وزیراعظم شہباز شریف کے وزارت عظمیٰ کا منصب سنبھالنے کے بعد میڈیا اور سماجی رابطوں کی ویب سائٹس پر بے بنیاد اور من گھڑت خبریں پھیلانے کا سلسلہ رکنا چاہیے۔ انہوں نے کہا کہ وزیراعظم ہاؤس کے علاوہ کسی اور جگہ کو کیمپ آفس ڈکلیئر کرنے کی خبریں بے بنیاد اور جھوٹ کا پلندہ ہیں، پولیس فورس اور انتظامی عملے کی کسی بھی جگہ تعیناتی کی خبروں میں بھی کسی قسم کی صداقت نہیں۔
ان کا کہنا تھا کہ اداریہ نویس اور میڈیا کے ساتھیوں سے گزارش ہے کہ ایسی کوئی بھی بے بنیاد خبر نشر کرنے سے پہلے تصدیق کر لیں، سوشل میڈیا صارفین سے بھی گزارش ہے کہ ایسے منفی پراپیگنڈے کو مسترد کردیں۔
یاد رہے کہ سوشل میڈیا پر وزیراعظم شہبازشریف کی نجی رہائش سمیت دیگر جگہوں کو وزیراعظم کا کیمپ آفس ڈیکلیئر کرنے کی خبریں گردش کر رہی تھیں۔
