پاکستان تحریک انصاف کے وائس چیئرمین شاہ محمود قریشی نے چیئرمین پی ٹی آئی کیخلاف ایک اور سازش کا انکشاف کیا ہے۔

لاہور جلسے سے خطاب کرتے ہوئے شاہ محمود قریشی نے کہا کہ اسلام آباد میں عمران خان اور پارٹی کیخلاف ایک اور سازش کی جا رہی ہے۔ انہوں نے کہا کہ الیکشن کمیشن میں فارن فنڈنگ کیس کے ذریعے عمران خان کو نااہل کرنے کی سازش کی جا رہی ہے۔

انہوں نے پی ٹی آئی ورکرسے سوال کرتے ہوئے کہا کہ  کیا پی پی اور ن لیگ کو جواب نہیں دینا چاہیے؟ انہوں نے کہا کہ  ہم جواب دینے کیلئے تیار ہیں لیکن یکطرفہ کارروائی نہیں ہوسکتی۔

شاہ محمود قریشی کا کہنا تھا کہ فارن فنڈنگ کیس عمران خان کیساتھ پارٹی پر پابندی لگانے کی بھی کوشش کی جا رہی ہے، یہ عمران خان کو دیوار سے لگایا جا رہا ہے۔

سابق وزیر خارجہ نے مزید کہا کہ یہ سب تو کہتے تھے کہ ہم انتخابات کیلئے تیار ہیں اب کیا ہوگیا ہے، ملک کو بھنور سے نکالنا ہے تو وہ ایک ہی راستہ نئے انتخابات ہیں، ہم انتخابات کیلئے تیار ہیں اب یہ کیوں بھاگ رہے ہیں؟