شہباز حکومت کی مشکلات میں اضافہ ہوا،ایک اوراتحادی جماعت نے حکومت کا ساتھ دینے سے معذرت کر لی ہے ۔

تفصیلات کے مطابق ذرائع کا کہنا ہے کہ وزیراعظم شہباز شریف نے اے این پی کی قیادت سے رابطہ کیا اور کابینہ کا حصہ بننے کی درخواست کی۔ عوامی نیشنل پارٹی (اے این پی) نے ایک بار پھر وفاقی کابینہ کا حصہ بننے سے انکار کردیا۔ذرائع کے مطابق  اے این پی نے کابینہ کا حصہ بننے سے معذرت کرلی۔

وزیراعظم نے عوامی نیشنل پارٹی کو ایک وزارت دینے کی پیشکش کی، اے این پی نے آصف زرداری سے وزارت مواصلات اور وزیر مملکت کا مطالبہ کیا تھا۔

ذرائع کا کہنا ہے کہ مولانا اسعد محمود کو وزارت مواصلات دینے پر اے این پی نے ناراضگی کا اظہار کیا تھا۔

یاد رہے کہا اس سے قبل اے این پی کے سربراہ اسفند یارولی کا کہنا تھاکہ عوامی نیشنل پارٹی کی ترجیحات حکومت نہیں بلکہ عوام ہیں۔ ان کا کہنا تھاکہ پی پی اور ن لیگ کے مشکور ہیں کہ حکومت کا حصہ بننے کیلئے مدعو کیا، مشکلات کو مدنظر رکھ کرتجویز دی ہے کہ باقی اتحادیوں کو کابینہ میں جگہ دیں۔

اسفندیار ولی کا کہنا تھاکہ ملک اور حکومت پہلے سے مشکلات سے دوچار ہیں، مزید مشکلات پیدا نہیں کرنا چاہتے، ہماری ترجیح روز اول سے حکومتی عہدے نہیں، عوام، پارٹی تنظیم اور نظریہ ہے۔