جاپان کے شمالی جزیرے ہوکائیڈو کے قریب دو بچوں سمیت 26 سیاحوں  سے بھری کشتی لاپتہ ہوگئی ہے، جس کی تلاش کیلئے ریسکیو آپریشن شروع کر دیا گیا ہے۔

جاپانی میڈیا کے مطابق جاپان کے کوسٹ گارڈز نے بتایا کہ سیاحتی کشتی میں دو بچوں سمیت 26 مسافر سوار تھے، جو جاپان کے شمالی جزیرے ہوکائیڈو کے گرد سیر کے دوران لاپتہ ہوگئی۔

میڈیا رپورٹس کے مطابق  کشتی کے عملے نے کوسٹ گارڈز کو دوپہر 1:15 پر اطلاع دی کہ کشتی پانی میں طغیانی کا شکار ہے،  بعدازاں سہہ پہر 3 بجے کے قریب رابطہ منقطع ہونے سے قبل کشتی 30 ڈگری پر جھکنے کی اطلاع دی گئی۔

کوسٹ گارڈز نے مزید بتایا کہ کشتی کا سراغ لگانے کیلئے ایک ہیلی کاپٹر اور اور بورڈز روانہ کر دی گئی ہیں، لیکن  رات 9 بجے تک کشتی اور مسافروں کا کوئی سراغ نہیں مل سکا۔