پاکستان تحریک انصاف (پی ٹی آئی) کا گزشتہ روز ملک بھر میں الیکشن کمیشن کے دفاتر کے باہر احتجاج کے اعلان کے بعد اسلام آباد میں الیکشن کمیشن کے باہر پولیس کی بھاری نفری تعینات کردی گئی۔

پولیس کا کہنا ہے کہ ریڈ زون میں ڈپٹی کمشنر اسلام آباد کی طرف سے دفعہ 144 نافذ العمل ہے۔ سیاسی جماعتوں اور شہریوں سے اپیل ہے کہ ریڈ زون میں احتجاج نہ کیا جائے۔اسلام آباد پولیس کے ترجمان کا کہنا ہے کہ پُرامن احتجاج ریڈ زون سے باہر، نیشنل پریس کلب یا ایف نائن پارک میں ریکارڈ کرایا جاسکتا ہے۔پولیس کا کہنا ہے کہ ریڈ زون کے اندر کسی احتجاجی مظاہرے کی اجازت نہیں ہوگی، اس سلسلے میں سپریم کورٹ،اسلام آباد ہائیکورٹ کے احکامات واضح ہیں۔

ترجمان اسلام آباد پولیس نے مزید کہا ہے کہ امن وامان میں خلل یا قانون ہاتھ میں لینے کی اجازت نہیں دی جائے گی، ریڈ زون کے اندر، باہر اینٹی رائٹ فورس کے دستے تعینات کئے گئے ہیں۔