مسلم لیگ (ن) کے رہنما عطا تارڑ نے کہا کہ لاہور ہائیکورٹ کے حکم کے بعد اب صدر اور گورنر کے پاس حلف لینے کے سواء کوئی راستہ نہیں بچا ، آج عدالت نے ٹائم فریم خود طے کر دیا  ہے ۔

لاہور میں میڈیا سے گفتگو کرتے ہوئے عطا تارڑ نے کہا کہ  آج عدالت نے ٹائم فریم خود طے کر دیاہے ،  اب یہ کل تک  حلف دینے کے پابند ہیں ، قانون کو پامال کرنے کا سلسلہ بند ہونا چاہئے ، آج آئین کابھی بول بالا ہوا ہے ، قانون کی عزت بھی  بحال ہوئی ہے ، حمزہ شہباز شریف حلف اٹھائیں گے  ، اب  کسی صدر ، سپیکر ، گورنر کے پاس کوئی راستہ نہیں ہے کہ وہ قانون  کو پامال کریں ۔

رہنما مسلم  لیگ (ن) نے مزید کہا کہ گورنر صاحب سے کہتا ہوں کہ آپ بھلے آدمی تھے ، آپ کے خلاف ایڈوائس آگئی ہے ، اب آپ کو گھر  چلے جانا چاہئے ،  آپ کے پاس اخلاقی جواز نہیں بچا،  اپ عزت سے اپنے گھر چلے جائیں، آپ نے   گورنر ہاؤس کو  آئین شکنی  کا مرکز بنایا ہے  ، اس سے گورنر کے عہدے اور گورنر ہاؤس کی بے توقیری ہوئی ہے  ،   صدر پاکستان نے ثابت کیا کہ وہ عمران خان کے وفادار ہیں ۔